د کابل ولایت په ښونځیوکې د افغانۍ د کارولو په اړه د عامه پوهاوي پروګرامونه
![د کابل ولایت په ښونځیوکې د افغانۍ د کارولو په اړه د عامه پوهاوي پروګرامونه](/sites/default/files/2019-11/dabwebsite1.jpg)
کابل، د ۱۳۹۸ کال د لړم ۷ مه - د افغانستان بانک د افغانۍ د کارولو او ښه ساتلو او د اسعارو د مخنیوي په اړه د عامه پوهاوۍ پروګرام د هېواد په بېلا بېلو ښونځیو کې په لاره واچول شو.
د افغانستان بانک د ریاست د دفتر لوی آمریت له خوا د تشویقي او تعلیماتي توکو د ویشلو بهیر د وږي په ۲۴ مه د کابل ښار له ښونځیو څخه پيل کړ چې یوازینۍ موخه یې په ټولو راکړو او ورکړو کې د افغانۍ کارول، د اسعارو مخنیوی او د افغانۍ بانکنوټونو ښه ساتنه ګڼل کېږي.
دغه بهېر پر کابل سربېره د افغانستان بانک په اوو زونونو کې له کابل سره هم مهاله پیل شو چې یوازې کابل کې دیرش ښونځي تر پوښښ لاندې راغلل.
په دې پروګرام کې د ښونځیو زده کوونکو ته په پیر او پلور کې د افغانۍ کارونې سربېره د اسعارو مخنیوی، د افغانیو بانکنوټونو ښه ساتنه، د بانکنوټونو او سکو په اړه لنډ معلومات وړاندې شول او له دې سره هم مهاله بیا زده کوونکو ته د ښونځیو بکسې، قلمونه، د افغانستان نقشې، ښوونیزې رسالې، ضرب زباني او د استادانو لپاره پيالې او د ښونځیو د مدیریتونو لپاره دیوالي کړۍ یا ساعتونه چې د افغانۍ د کارونې په پيغامونو ښکلي شوي ول، وویشل شول.