د صنعت کارانو، سوداګرو، بزګرانو، هټیوالو او کسبګرو لپاره د پورونو د ورکړې په پروسه کې د آسانتیاوو د رامنځته کولو په موخه د افغانستان بانک له لوري د درېیو هوکړه لیکونو لاسلیک
۱۴۰۰ کال د غوايي ۷ مه – د افغانستان بانک د سوداګریزو بانکونو له لوري صنعت کارانو، تشبثاتو، د کرنې سکتور د پرمختګ او کسبګرو ته د پورونو د ورکړې په برخه کې د آسانتیاوو رامنځته کولو په موخه درې ځانګړي درې اړخیزه او څلور اړخیزه هوکړه لیکونه د افغانستان د صنایعو او کانونو خونو، د کرنیزو او مالدارۍ محصولاتو، د افغانستان د خونو فدراسیون، د کسبګرو او هټیوالو ټولنې او د افغانستان د بانکونو ټولنې تر منځ لاسلیک شول.
د دې غونډې په پیل کې د افغانستان بانک سرپرست ښاغلي اجمل احمدي د هېواد په اقتصادي وده کې د بانکونو پر رول، د پانګې اچونې، منځنیو او کوچنیو تشبثاتو د رامنځته کولو، د کاري زمینو د پراختیا او صنعت د ودې په برخه کې د بانکونو له لوري د پورونو د ورکړې په برخه کې د آسانتیاوو پر رامنځته کولو خبرې وکړې او له سوداګریزو بانکونو یې وغوښتل چې د اړوند قوانینو او مقرراتو په رڼا کې د هېواد د اقتصادي ودې په برخه کې غوره رول تر سره کړي.
ورپسې د افغانستان د خونو فدراسیون رئیس ښاغلي محمد اسماعیل غضنفر د خصوصي سکتور د پرمختګ لپاره د زمېنې برابرولو او د خونو د را غونډولو او د دوی لپاره د آسانیتاوو د رامنځته کولو په برخه کې د افغانستان بانک د سرپرست ښاغلي اجمل احمدي له طرحې او نوښت مننه او قدرداني وکړه.
د دې غونډې په بله برخه کې د افغانستان د بانکونو ټولنې عمومي مشر ښاغلي سالم امید د بانکونو د اړیکو د پیاوړتیا او همغږۍ په برخه کې د ښاغلي احمدي له کړنو ستاینه وکړه او زیاته یې کړه چې دا مهال بانکونه د غوره سیالیت لرونکي دي او د هېواد د اقتصادي ودې لپاره له خصوصي سکتور سره د پورونو په برخه کې د هر ډول همکارۍ لپاره تیار دي.
د دې غونډې پر دوام د افغانستان د صنایعو او کانونو عمومي رئیس ښاغلي شیرباز کمینزاده، د افغانستان د کرنیزو او مالدارۍ خونو رئیس ښاغلي خان محمد فروتن او د کسبګرو او هټیوالو ټولنې عمومي رئیس ښاغلي نور الحق عمري په صنعت او سوداګرۍ وزارت کې د ښاغلي اجمل احمدي له کړنو ستاینه وکړه او په د افغانستان بانک کې یې د بانکي نظام د پیاوړتیا او د بانکونو او خصوصي سکتور تر منځ د نوموړي شتون مثبت یاد کړ او له یادې پروسې یې هر کلی وکړ.