د سوداګریزو بانکونو د استازو لپاره د ښوونیز پروګرام جوړېدل
۱۴۴۵ ذوالحجة الحرام ۲۶ مه – د افغانستان بانک د مالي رپوټونو او معاملو د شننې مرکز له لوري د یو شمېر سوداګریزو بانکونو د قوانینو رعایتولو برخې د کارکوونکو لپاره ښوونیز پروګرام جوړ شو.
دا ښوونیز پروګرام د پیسو وینځلو او نورو اړوندو جرمونو سره د مبارزې په برخه کې د بانکي سکتور د ظرفیت لوړولو په موخه جوړ شوی وو.
په یاد پروګرام کې د سوداګریزو بانکونو د اړوندې برخې کارکوونکو ته د سوداګریزو بانکونو د پېرودونکو د شکمنو او لویو معاملو د رپوټونو چمتو کولو او همدارنګه د مالي رپوټونو او معاملو د شننې مرکز تر نظر لاندې نوملړ د پلي کولو په برخه کې د پیسو وینځلو او له جرمونو څخه د را پیدا شوو عوایدو د مخنیوي قانون، مقرراتو، عملیاتي برخو او یو شمېر نورو اړوندو موضوعاتو په اړه تفصیلي معلومات ورکړل شول.
