د سوداګریزو بانکونو له استازو سره غونډه
۱۴۴۳ ذوالقعده ۱۵ مه- د افغانستان بانک د لومړي مرستیال ښاغلي نور احمد آغا پر مشرۍ د افغانستان بانک د عالي شورا په تالار کې د سوداګریزو بانکونو له استازو سره غونډه جوړه شوه.
په یاده غونډه کې د افغانستان بانک لومړي مرستیال ښاغلي نوراحمد آغا د سوداګریزو بانکونو د ستونزو پر حل، د دې بانکونو په خالي بستونو کې د مسلکي کسانو پر استخدام او خلکو ته د غوره بانکي خدمتونو د وړاندې کولو په اړه هر اړخیزې خبرې وکړې او د افغانستان بانک له اړخه یې د دې بانکونو استازو ته د پوره همکارۍ ډاډ ورکړ.
باید وویل شي چې په دې غونډه کې د افغانستان بانک ستر اقتصادي سلاکار ښاغلي لطف الحق نور پسرلي هم ګډون کړی ؤ او د سوداګریزو بانکونو له استازو یې په چارو کې د لا ډېرې همغږۍ غوښتنه وکړه، نوموړي د سوداګریزو بانکونو له استازو وغوښتل چې د خلکو لپاره غوره بانکي خدمتونه وړاندې کړي او په دې برخه کې اړینې آسانتیاوې رامنځته کړي.
د یادونې وړ ده چې په دې غونډه کې د افغانستان بانک له بانکونو څخه د څارنې لوی آمر ښاغلي عبدالرحمن قانت، د افغانستان د بانکونو د ټولنې او د سوداګریزو بانکونو استازو ګډون کړی وو.
