د سوداګریزو بانکونو له استازو سره غونډه
د ۱۳۹۹ کال د چنګاښ ۳۱ مه – د افغانستان بانک د سرپرست ښاغلي اجمل احمدي په مشرۍ د سوداګریزو بانکونو له استازو سره غونډه جوړه شوه.
په دې غونډه کې بانکي خدمتونو او محصولاتو ته د خلکو په لاسرسي، د بانکونو له لوري د باکیفیته خدمتونو په وړاندې کولو، د افغانستان د اداینو په سیستم او د بریښنایی بانکدارۍ پر محصولاتو، په بازار کې د لیټراف کريډیټونو لپاره تقاضا، د بانکونو تر منځ په تخنیکي همکاریو او په دې سکتور د قانون جوړونکي او څارونکي په توګه د افغانستان بانک پر نقش او د مالي خدمتونو د وړاندې کولو په برخه کې پر شته ستونزو خبرې وشوې.
په پیل کې د سوداګریزو بانکونو استازو هر یو په خپل نوبت سره معلومات وړاندې کړل او په دې اړه یې خپلې ستونزې د افغانستان بانک له رهبرۍ سره شریکې کړې.
تر هغې وروسته د افغانستان بانک سرپرست ښاغلي اجمل احمدي یادونه وکړه چې د افغانستان بانک د هېواد د مالي او بانکي نظام برخو کې د اصلاحاتو رامنځته کولو ته ژمن دی او هڅه کوي چې د بانکوالۍ د قانون په چوکاټ کې د دې نظام د سلامت لپاره کار وکړي.
