د سویس زرلنډ هیواد له استازو سره لیدنه
۱۴۰۱ وری ۹ مه – د افغانستان بانک د دویم مرستیال ښاغلي عبدالقدیر احمد پر مشرۍ د سویس زرلنډ هیواد له استازو سره د افغانستان بانک په مرکزي دفتر کې غونډه تر سره شوه.
په دې غونډه کې د بشرپاله مرستو د میکانیزم په برخه کې د آسانتیاوو رامنځته کولو، د افغانستان بانک د پولي سیاست، مالي او بانکي چارو په اړه هر اړخیز بحثونه تر سره شول.
په یاده غونډه کې د افغانستان بانک دویم مرستیال ښاغلي عبدالقدیر احمد یادونه وکړه چې د افغانستان بانک په مالي او بانکي برخو کې ټولو نړیوالو اصولو ته ژمن دی او له نړیوالې ټولنې هم غواړي چې خپلې بشرپاله مرستې د بانکي سکتور له لارې تر سره کړي.
نوموړي زیاته کړه چې د بانکي سکتور له لارې د مرستو تر سره کول روڼتیا راولي او خلکو ته د مرستو د رسولو په برخه کې آسانتیاوې رامنځته کوي.
د ښاغلي احمد په خبره دوی د بانکي نظام د پیاوړتیا او چارو د ښه والي په موخه له بېلابېلو ادارو سره ناستې تر سره کړې دي او په دې برخه کې به خپلې هلې ځلې جاري وساتي.
باید وویل شي چې په دې غونډه کې د سویس زرلنډ هیواد استازو هم په مالي او بانکي برخو کې د هر ډول مرستې او همکارۍ ژمنه وکړه او یادونه یې وکړه چې د افغانستان بانک سره هر ډول همکارۍ ته چمتوالی لري.
