د مالي خدمتونو د پراختیا لپاره هلې ځلې
۱۴۴۶ محرم الحرام ۱۴ مه – د افغانستان بانک سرپرست رئیس ښاغلي نور احمد آغا په افغانستان کې د ملګرو ملتونو د پرمختیایي ادارې له مشر سټیفن روډریګز او مل پلاوي سره ولیدل او پر مختلفو مالي او بانکي موضوعاتو یې ورسره خبرې وکړې.
په یاده غونډه کې د افغانستان بانک د ټولو سرپرست رئیس ښاغلي نور احمد آغا د کوچنیو پورونو د ورکړې او بیکارۍ کچې راکمولو برخه کې د ملګرو ملتونو له پرمختیایي پروګرام د ستاینې تر څنګ په دې برخه کې د لا زیاتو هلو ځلو او همکارۍ غوښتنه وکړه.
نوموړي زیاته کړه چې د کوچنیو کاروبارونو تمویل او د لا زیاتو اسلامي تمویلاتو رامنځته کول د هېواد په اقتصاد کې مهم رول تر سره کوي او دا چاره کولای شي چې له خلکو سره د دندو په رامنځته کولو کې مرسته وکړي.
په یاده غونډه کې د ملګرو ملتونو د پرمختیايي پروګرام مشر ښاغلي سټیفن روډریګز وویل چې د افغانستان اسلامي امارت تر بیا ځلي حاکمیت وروسته په افغانستان کې د افغانۍ د ثبات، د انفلاسیون د کنترول، ټولیز اقتصادي پرمختګ، صادراتي ودې او د اداري فساد د مخنیوي په برخو کې د پام وړ پرمختګونه رامنځته شوي دي چې د ستاینې وړ دي.
ښاغلي روډریګز زیاته کړه د ملګرو ملتونو پرمختیايي پروګرام په افغانستان کې د بریښنایي اداینو د پراختیا او کوچنیو پورونو په تمویل سره د مالي خدمتونو د پراختیا لپاره کار کوي، ترڅو وکولای شي په دې برخه کې لا ډېر پرمختګونه رامنځته شي.
