د ۱۳۹۹ مالي کال په اوږدو کې د افغانستان بانک د عالي شورا دویمه غونډې ترسره شوه
کابل، ۱۳۹۹ د چنګاښ ۴- د افغانستان بانک عالي شورا چې د دې بانک د تصمیم نیولو تر ټولو غوره مرجع ده، د ۱۳۹۹ مالي کال دویمه نوبتي غونډه یې د کرونا وایروس د خپریدو د مخنیوي په پام کې نیولو سره په انلاین ډول له لیرې واټن څخه ترسره کړه. دا غونډه چې د افغانستان بانک د لوی ریاست د سرپرست ښاغلي اجمل احمدي په مشرۍ جوړه شوې وه، په پیل کې د عالي شورا غړو د افغانستان بانک د ریاست په بست کې د ښاغلي اجمل احمدي د ټاکل کیدو مبارکي وویله او دوی ته یې د لا بریاوو هیله څرګنده کړه. ورپسې د غونډې په اوږدو کې د افغانستان اقتصادي وضعیت، د پولي سیاست د پلي کېدو څرنګوالی، د بانکي نظام کړنې او د افغانستان بانک او د هېواد د مالي نظام اړوند نور موضوعات تر بحث لاندې ونیول شول. د یادونې وړ ده چې د افغانستان بانک عالي شورا په کال کې څلور ځله په ربعواره ډول غونډې ترسره کوي چې د یادو غونډو په اوږدو کې د سیاست جوړونې په بېلابېلو موضوعاتو، د بانک د کړنو په طرحې، اجرااتو او لاسته راوړنو باندې بحث او نظرونه سره تبادله کوي او د بانک او د هېواد د مالي نظام د کړنو د ښه والي لپاره اړینې پرېکړې ترسره کوي.
