په استانبول ښار کې د اسلامي همکاریو سازمان د مرکزي بانکونو فورم د څلورمې غونډې جوړېدل
۱۴۴۴ د صفر المظفر ۲۸ – ۲۹ مه – د روانې سپټمبر میاشتې په ۲۵ او ۲۶ نېټه د ترکیې هېواد په استانبول ښار کې د اسلامي همکاریو سازمان د مرکزي بانکونو فورم چې د نړۍ ۵۷ هېوادونه یې غړیتوب لري څلورمه غونډه جوړه شوه.
پدې غونډه کې د افغانستان بانک ( د افغانستان مرکزي بانک) په استازولۍ د دې بانک د ریاست د دفتر لوی آمر ښاغلي صدیق الله خالد او د دې بانک د اسلامي بانکوالۍ او مالي خدمتونو لوی آمر ښاغلي دوکتور محمد یوسف سلیم ګډون کړی وو.
پدې مهم دوه ورځني کنفرانس کې د اسلامي بانکوالۍ اړوند مهمو موضوعاتو په اړه بحث او پرېکړې تر سره شوې چې د اسلامي بانکوالۍ پراختیا او دودول، پدې اړوند روزنیزو پروګرامونه، د اسلامي هېوادونو تر منځ د حلالې سوداګرۍ وده، برېښنایي اداینو ته د زمینې برابرول او د نقدینګۍ مدیریت برخې پکې شاملې وې.
باید وویل شي چې د افغانستان بانک تل هڅه کړې ده چې له نورو اسلامي هېوادونو سره په همغږۍ او د نړیوالو منل شوو معیارونو پر بنسټ ټولې بانکي چارې تنظیم کړي او د نړۍ د هېوادونو له مرکزي بانکونو سره غوره اړیکې ولري.
