د افغانستان بانک د سرپرست رئیس پیغام
درنو هېوادوالو!
یو ځل بیا ډاډ درکوم چې د معقولو پولي سیاستونو په پلي کولو سره چې د اسعارو پر وړاندې د افغانۍ د ارزښت ساتلو او کورنیو بیو د ثبات لامل کېږي خپلې هلې ځلې جاري ساتو او همدارنګه د بانکي نظام د ټینګښت او په دې سکتور کې د سمونونو راوستلو او لا ښه والي لپاره به کوټلي ګامونه پورته کړو.
له سیاسي بدلون وروسته د هغو محدودو بانکونو سره چې تر فشار لاندې دي په ټول ځواک کار کوو او پر هغوی به زمونږ څارنه د ملاتړ په ډول وي، تر څو بانکي نظام لا پیاوړی او د خدمتونو کچه پراخه او با کیفیته شي.
د عنعنوي بانکدارۍ نظام څخه اسلامي بانکدارۍ نظام ته اړول زمونږ د کاري لومړیتوبونو څخه دي، په دې برخه کې لومړني ګامونه پورته شوي، د مالی، بشري او سیستمونو ظرفیت ته په کتلو سره به یې قدم په قدم څارنه وکړو.
همدارنګه د افغانستان بانک د بانکي اړیکو د پراختیا او پرمختګ په برخه کې د نړۍ له هېوادونو او ادارو سره د تعامل له مخې پر خپلې ژمنې ولاړ دی او د اړیکو د لا ښه والي لپاره چې د هېوادوالو د هوساینې، خصوصي سکتور او د اقتصادي ودې لامل کېږي، هڅې جاري وساتي.
د افغانستان بانک د هېواد د مرکزي بانک په توګه پر خپلو نړیوالو ژمنو ولاړ دی، مونږ د پیسو وینځلو او د ډالرو د قاچاق پر وړاندې مبارزې ته جدي پاملرنه کوو او د امنیتي او قضايي ادارو په همکارۍ به دې مهمې مسئلې ته رسیدنه وکړو.
د صرافیو او د پولي خدمتونو د وړاندې کوونکو د کړنو تنظیمول زمونږ لپاره بله ستراتیژیکه مسئله ده او دې موضوع ته به په پوره جدیت سره ګډ کار ته دوام ورکړو.
د افغانستان بانک د کنګل شوې شتمنۍ بېرته عادي حالت ته راوړل او د قانون په رڼا کې د هغه کارولو لپاره له نړیوالو شریکانو سره خپلو تخنیکي بحثونو ته د مطلوبو پایلو تر ترلاسه کولو پورې دوام ورکوو.
د دې پروګرامونو د پلي کولو لپاره له الله جل جلاله څخه د عمل کولو د توفیق غوښتونکي یو.
په درنښت
نور احمد آغا
د افغانستان بانک سرپرست رئیس