د خدمتونو لوی آمريت
د خدمتونو د لوی آمریت دندې پر وخت او معیاري خدمتونو لکه ( ښه کاري چاپېريال، اثاثیې، برېښنا، ټرانسپورټ، د نغدو پیسو لېږد، د سفر تیکټونه، د کارکوونکو د سالمو خوړو برابرول، املاک، حفظ او مراقبت، د نویو ودانيو جوړول او د ټولو ودانيو د رغولو) د خدمتونو وړاندې کول دي.
تشکیلاتي جوړښت
د خدمتونو لوی آمریت لخ دوو عملیاتي او تعمیراتي مرستیالانو څخه جوړ دی چې هر یو مرستیالیت په خپل جوړښت کې لاندې مدیریتونه تر کنټرول لاندې لري:
عملیاتي مرستیال
دا مرستیالیت د خدمتونو د آمریت په تشکیلاتي اډانه کې یو مهم مرستیالیت دی چې عملیاتي کړنې ترسره کوي، دا مرستیالیت په خپل جوړښت کې عملیاتي، د امنیت ساتوونکو او ټرانسپورت مدیریتونه لري.
1. عملياتي مديریت
دا مدیریت د بانک د کارکوونکو د رسمي سفرونو د تګ راتګ ټېکټونو د چمتو کولو، د کورنیو او بهرنیو مېلمنو د ډوډۍ برابرولو، د کارکوونکو د سفریو او د غرمې ډوډۍ د لګښتونو، جېب خرچې او د موبايل کارتونو لګښتونو د اجراء کولو مسووليت لري.
2. د امنیت ساتوونکو مدیریت
دا مدیریت د مراجعینو د چارو د ښه تنظیم او د وخت نه ضايع کېدو، پر خپل وخت د تشریفاتي چارو د ترسره کولو او هغو مراجعینو ته د نظم او اړینو کاري اسانتیاوو د برابرولو او ښو تشریفاتي خدمتونو وړاندې کولو مسوولیت په غاړه لري چې د افغانستان بانک مرکزي ادارې یا اړوندو ښاري څانګو ته د خپلو ورځنیو چارو د ترسره کولو لپاره مراجعه کوي.
3. د ټرانسپورټ مدیریت
دا مدیریت د بانک کارکوونکو او د رسمي ورځنیو چارو لپاره د ټرانسپورټي اسانتیاوو د برابرولو مسووليت په غاړه لري.
4. اداري مدیریت
د سندونو لیکل، د صادره او وارده مکتوبونو، استعلامونو او غوښتنليکونو طی مراحل، برېښنا لیکونو ته ځواب ورکول او داسې نورې اداري دندې لکه د مهالوېش ترتیبول او په فزیکي او برېښنايي ډول د افغانستان بانک د اړوندو آمریتونو ترمنځ د مالوماتو تبادله کول د دې مدیریت بنسټیزې دندې دي.
د تعمیراتو مرستیالیت
د تعمیراتو مرستیالیت په مرکز او ولایتي نمايندګيو کې د افغانستان بانک د ټولو ودانيو د جوړولو او رغولو مسووليت پر غاړه لري. سربېره پر دې، د افغانستان بانک د اړوندو آمریتونو لپاره د تعمیراتي بودېجې ترتیبول د دې مدیریت بله دنده ده. دا مرستیالیت لاندې درې مدیریتونه لري:
1. د ساتنې او مراقبت مدیریت
ساتنه او مراقبت او د مرکزي بانک پاکول د دې مدیریت بنسټیزې دندې دي.
2. د املاکو مديريت
د املاکو مدیریت د غصب د مخنیوي او د مرکز او ولایتونو په کچه د عواېدو د کچې زیاتولو په موخه د افغانستان بانک د ملکیتونو د کرایې تړونونو د چارو تنظیمولو مسوولیت په غاړه لري.
3. د انجينرۍ مديریت
د انجینرۍ مدیریت د سروې ګانو د ترسره کولو، د (کوچنیو پروژو) ډیزاینولو او د ولایتونو په نماينده ګيو کې د پروژو د جوړښتيزو او رغنیزو چارو د ترسره کولو، د هغو پروژو د سندونو پلټلو چې د افغانستان بانک ته رالېږل کېږي، د جوړښتیزو او رغنیزو پروژو لپاره د آفر پرانېستنې په غونډو کې ګډون او د پروژې د کار له بشپړېدو وروسته عامل پلاوي ته د پروپوزل ترتیبولو مسووليت په غاړه لري.