د افغانستان بانک د مسلکي او تجربه لرونکو کارکوونکو ساتلو او پرمختګ ته ژمن دی
د دې په پام کې نیولو سره چې په هره اداره کې بشري سرچینې د ودې، اغیزمنتیا او تولید عامل دي، د افغانستان بانک مشرتابه پلاوي دا اصول په جدي توګه مراعات کړي او د بانک مسلکي او تجربه لرونکي کارکوونکي یې ساتلي او د دوی لپاره یې غوره کاري چاپیریال برابر کړی دی.
د دې مهم اصل په پام کې نیولو سره، د د افغانستان بانک مشرتابه پلاوي په دې وروستیو کې د بانک یو شمېر مسلکي، په کار پوه او تجربه لرونکوکارکوونکو ته ارتقا ورکړې ده چې په لاندې ډول درنو هیوادوالو ته ورپېژندل کېږي:
ښاغلی احمد جواد سداد:
ښاغلی احمد جواد سداد په ۱۳۸۶ ل کال کې د کابل پوهنتون د اقتصاد پوهنځی څخه د لیسانس سند تر لاسه او په ۱۳۹۳ لمریز کال کې یې له یاد پوهنتون څخه د اقتصاد په برخه کې ماستري هم اخیستې ده.
ښاغلي سداد په ۱۳۸۷ ل کال کې د افغانستان بانک کې دنده پیل کړې ده او په ګڼو مدیریتي پوستونو یې کار کړی دی، نوموړي په ۱۳۸۷ کال کې د ازادې سیالۍ له لارې د افغانستان بانک د پولي سیاست د لوی آمریت د مرستیال بست ته ارتقا وکړه.
ښاغلي احمد جواد سداد په افغانستان بانک کې د خپلې دندې په ترڅ کې د افغانستان په استازیتوب د پیسو نړیوال صندوق په ډېرو تخنیکي غونډو او بحثونو کې په فعاله توګه ګډون کړی او همدارنګه یې د افغانستان په دننه او بهر کې د پولي سیاست د طرحې او پلي کولو په برخه کې په ډېر شمېر روزنیزو پروګرامونو کې ګډون کړی دی.
ښاغلی سداد له تېرو اتو میاشتو راپدېخوا د خپلو خلکو او هیواد لپاره په پوره ژمنتیا او اخلاص سره د خپلو خلکو ترڅنګ پاتې شوی او د افغانستان بانک د پولي سیاست د لوی آمریت د سرپرست په توګه یې نه ستړې کېدونکې هلې ځلې کړې دي.
د افغانستان بانک مشرتابه پلاوي د ښاغلي سداد مسلکي ظرفیت، کاري تجربې، لوړو زده کړو او هیواد پالنې ته په پام سره نوموړی په دې وروستیو کې د افغانستان بانک د پولي سیاست د لوی آمر په توګه ګمارلی دی. د افغانستان بانک مشرتابه پلاوی نوموړي ته د لوی خدای ج له درباره په چارو کې د لا زیاتو بریالیتوبونو هیله کوي
