د سوداګریزو بانکونو له رئیسانو سره د افغانستان بانک د لومړي مرستیال غونډه
د ۱۴۴۷ کال د ربیع الثاني د میاشتې ۲۷ مه - د افغانستان بانک د لومړي مرستیال ښاغلي صدیقالله خالد په مشرۍ د سوداګریزو بانکونو له رئیسانو سره غونډه ترسره شوه. په دې غونډه کې د بانکي سکتور د پیاوړتیا، د اسلامي بانکوالۍ د پراختیا، برېښنایي بانکوالۍ او د بانکي خدمتونو د کیفیت د لوړولو په اړه هر اړخیز بحث وشو.
ښاغلي صدیق الله خالد د غونډې په پیل کې یادونه وکړه چې د هېواد بانکي سکتور د اسلامي کېدو په بشپړ بهیر کې داخل شوی او ډېر ژر به یو شمېر بانکونو ته د بشپړې اسلامي بانکوالۍ جوازونه ورکړل شي. نوموړي له سوداګریزو بانکونو وغوښتل چې د اسلامي بانکوالۍ له اصولو سره سم، د اسلامي مالي محصولاتو د تنوع او وړاندې کولو له لارې خلکو ته د غوره او باوري خدمتونو د وړاندې کولو زمینه برابره کړي.
د افغانستان بانک لومړي مرستیال همدارنګه د بانکي سکتور د بشري ظرفیتونو د پیاوړتیا پر اهمیت خبرې وکړې او په دې برخه کې یې د مالي او بانکي انستیتوت د بیا فعالیدو یادونه وکړه. نوموړي ټینګار وکړ چې سوداګریز بانکونه باید د خپلو کارکوونکو د مسلکي وړتیاوو د لوړولو په موخه عملي ګامونه واخلي، ترڅو د نړیوالو معیارونو سره سم د اغېزناکو او باکیفیته بانکي خدمتونو د وړاندې کولو لپاره لا ډېره زمینه برابره شي.
په غونډه کې له اجنډا سره سم د افغانۍ د ثبات ساتنې، د بانکي خدمتونو د چټکتیا او غورهوالي، د بانکي سکتور د پرمختګ، ډیجیټل بانکوالۍ، ستونزو او حل لارو په اړه هم بحثونه وشول.
په دغه غونډه کې د افغانستان بانک د اړوندو آمریتونو استازو، د افغانستان د بانکونو ټولنې، او د سوداګریزو بانکونو مشرانو او استازو ګډون درلود.
