د غیر بانکي مالي موسسو د څارنې لوی آمریت
غیر بانکي مالي موسسې (NBFI) هغه بنسټونه یا ادارې دي چې د بانکونو په څېر مالي خدمتونه وړاندې کوي، خو هره غیر بانکي مالي موسسه د خپل کاري ماهیت له مخې توپیر لري او د ټاکل شویو کړنو پر بنسټ د فعالیت ځانګړی جواز لري. غیر بانکي مالي موسسې چې اوس مهال په افغانستان کې فعالیت کوي او له د افغانستان بانک څخه یې د فعالیت جوازونه ترلاسه کړي دي، د صرافۍ او پولي خدمتونو شرکتونه، د بریښنایي پیسو موسسې او اداینیزې موسسې رانغاړي. همدارنګه، د مالي اجارې موسسې او د کوچنیو پورونو مالي موسسې هم کولای شي د اړوندو مقررې سره سم له د افغانستان بانک څخه د فعالیت جواز ترلاسه کړي.
د ۱۳۹۸ مالي کال په وروستیو کې، د غیر بانکي مالي موسسو لوی آمریت د مقرراتي مسوولیتونو د ترسره کولو او د هېواد د غیر بانکي مالي موسسو د څارنې په موخه تاسیس شوی او د بانکوالۍ د سکتور د کړنو د ودې او ښه والي ترڅنګ، د غیر بانکي مالي موسسو لوی آمریت هم د پام وړ وده کړې ده.
لید لوری (Vision)
د غیر بانکي مالي موسسو د یو سالم سکتور درلودل چې وکولای شي د بانکي سکتور ترڅنګ مالي سکتور ته وده ورکړي او د هېواد په اقتصادي وده او پراختیا کې د پام وړ ونډه واخلي.
موخې:
د غیر بانکي مالي موسسو له سالمو کړنو څخه په دوامداره توګه ډاډ ترلاسه کول؛
د غیر بانکي مالي موسسو د سکتور لپاره د یوې مناسبې اډانې جوړول؛
د مالي موسسو د غیر قانوني کړنو د مخنیوي لپاره اړینې کړنې ترسره کول؛
د مالي سکتور د پیریدونکو خوندیتوب؛
د غیر بانکي مالي موسسو په سکتور کې د غیر قانوني امانتونو او د تورو پیسو مخنیوی؛
د څارنیزو او مقرراتي هر اړخیزو چوکاټونو له لارې د پیسو وینځلو او د ترهګرۍ د تمویل د خطرونو محدودول؛
د مالي سکتور د ودې په موخه په افغانستان کې د مالي ټکنالوژۍ (FinTech) د پراختیا لپاره د یوې مناسبې کړنلارې جوړول.
دندې او مسوولیتونه:
د غیر بانکي مالي موسسو لوی آمریت د ساحې دننه او له ساحې څخه بهر څارنې د شننې او ارزونې سربیره پر هغو غیر بانکي مالي موسسو د نغدي جریمو په ګډون اصلاحي او تنفیذي اقدامات تر لاس لاندې نیسي، چې د بانکي قوانینو، مقرراتو او کړنلارو څخه سرغړونه کوي.
اداري جوړښت:
د غیر بانکي مالي موسسو د څارنې د لوی آمریت اوسنی جوړښتي تشکیل له څو بستونو څخه تشکیل شوی دی. په دې تشکیل کې یو آمر او د مرستیالانو دوه بستونه شامل دي چې د لوی مرستیال او د صرافانو او پولي خدمتونو د وړاندې کوونکو د څارنې مرستیال، شپږ مدیران او همدارنګه د هېواد په مرکز او زونونو کې کارکوونکي شامل دي.
لوی مرستیالیت:
لوی مرستیالیت درې مدیریتونه لري چې په کې د برېښنایی پیسو موسسو د څارنې مدیریت، د کوچنیو پورونو او مالي اجارې موسسو د څارنې مدیریت او د تعقیب او د ساحې څخه بهر څارنې مدیریت شامل دي. د یادونې وړ ده چې دا مرستیالیت د شرکتونو د ساحې دننه او ساحې څخه بهر څارنو ټولې چارې سرته رسوي.
د صرافانو او د پولي خدمتونو د وړاندې کوونکو د څارنې مرستیالیت:
دا مرستیالیت درې مدیریتونه لري چې په کې د جواز ورکونې مدیریت، د عمومي څارنې او د پیسو وینځلو او د ترهګرۍ د تمویل پر وړاندې د مبارزې مدیریت او د زونونو د همغږۍ مدیریتونه شامل دي. دا مدیریتونه ټولې مقرراتي، دجواز ورکونې، د صرافانو او پولي خدمتونو د وړاندې کوونکو د څارنې چارې ترسره کوي.