د افغانستان بانک له بین البانکي سیستم (ATS) سره د مالیې وزارت د افمس سیستم (AFMIS) د نښلولو د هوکړه لیک لاسلیک
۱۴۰۰ چنګاښ ۶ مه – د افغانستان بانک د اداینو په برخه کې د آسانتیاوو او اړینو سمونونو د رامنځته کولو په لړ کې او په دې برخه کې د دندو او صلاحیتونو د وضاحت لپاره د مالیې وزارت له افمس سیستم سره د بین البانکي اداینو سیستم نښلولو هوکړه لیک د مالیې له محترم وزارت سره لاسلیک کړ.
د دې هوکړه لیک له لاسلیک موخه د ادارې د چارو د غوره والي لپاره د پولي معاملو د لېږد اغیزناک مدیریت، د معاشونو د اداینې په برخه کې روڼتیا، د بین البانکي لګښتونو او لېږدونو ښه مدیریت له اداینیزو معاملو څخه په وخت د راپور ورکول، د وخت له ضایع کېدو مخنیوی، د چک او برېښنایي اداینو په برخه کې د لګښتونو راکمول او د دواړو ادارو تر منځ د لا زیاتې همکارۍ د چوکاټ رامنځته کول دي.
د افغانستان بانک ژمن دی چې د دولت، خصوصي سکتور او خلکو لپاره معیاري خدمتونه وړاندې کړي او له همدې کبله تل هڅه کوي چې د نړۍ پر ټولو منل شویو معیارونو برابرې چوپړتیاوې وړاندې کړي.
د ادارو تر منځ د اداینو د سیستمونو نښلول کولای شي چې د چارو د ګړندیتوب لامل شي له اداري فساد څخه مخنیوی وکړي، اداینې معیاري کړي او په ټول کې یو وړ، اغیزناک، پیاوړی او سالم مالي سیستم رامنځته کړي.
