د استوګنځي د پور په اړه د دولتي ادارو له کارکوونکو سره د پوهاوي غونډه
۱۴۰۰ کال د زمري ۱۰ – د افغانستان بانک د سرپرست ښاغلي اجمل احمدي په مشرۍ د افغانستان بانک په مرکزي دفتر کې د استوګنځي د پور په اړه غونډه جوړه شوه. په دې غونډه کې د کورنیو چارو، کار او ټولنیزو چارو، د سرحدونو او قبایلو چارو، ټولګټو، لوړو زدهکړو، پوهنې، بهرنیو چارو، د ښځو چارو، اطلاعاتو او فرهنګ او اقتصاد وزارتونو نمایندګانو ګډون کړی وو.
د دې غونډې په اوږدو کې ښاغلي اجمل احمدي د سوداګریزو بانکونو له لوري د دولتي کارکوونکو لپاره د استوګنځي د پور ورکړې په اړه خبرې وکړې او په دې اړه یې د دولتي ادارو له کارکوونکو سره هر اړخیز معلومات شریک کړل.
نوموړي یادونه وکړه چې د افغانستان بانک د ټولو هېوادوالو لپاره د معیاري مالي او بانکي خدمتونو وړاندې کولو ته ژمن دی او هڅه کوي چې د هېواد بانکي سکتور د ټولګټو پروګرامونو ملاتړ ته وهڅوي.
