د افغانستان د سوداګریزو شرکتونو او پانګهوالو ټولنې له استازو سره غونډه
۱۴۰۰ د سلواغې ۳ مه – د افغانستان بانک د سرپرست رئیس ښاغلي عبدالقاهر (حاجي ادریس) پر مشرۍ د افغانستان د سوداګریزو شرکتونو او پانګهوالو ټولنې له استازو سره د دوی د بانکي ستونزو د هواري په اړه غونډه جوړه شوه.
په یاده غونډه کې د افغانستان بانک سرپرست د افغانستان د سوداګریزو شرکتونو او پانګهوالو ټولنې له استازو سره په خبرو کې وویل، چې د افغانستان بانک مشرتابه ژمن دی چې د سوداګرو او پانګهوالو لپاره هر ډول بانکي آسانتیاوې برابرې کړي.
ښاغلي عبدالقاهر ( حاجي ادریس) د سوداګرۍ او پانګې اچونې په برخه کې د سوداګرو او پانګهوالو له هڅو ستاینه وکړه او زیاته یې کړه چې د افغانستان بانک به پر وخت سره په بانکي سکتور کې د سوداګرو ستونزو ته رسېدنه وکړي.
د یادونې وړ ده چې په دې غونډه کې د افغانستان د سوداګریزو شرکتونو او پانګهوالو ټولنې استازو د بانکي سکتور په برخه کې خپلې ستونزې د افغانستان بانک له سرپرست سره شریکې کړې او په دې اړه د نظرونو تبادله تر سره شوه.
