د افغانستان بانک له لوري په شمال زون کې مندرس بانکنوټونه وسوځول شول
۱۴۴۶هـ ق، ذوالقعدة الحرام ۱۶ - د افغانستان بانک د پولي راکړو ورکړو په برخه کې د آسانتیا رامنځته کولو او له ګردښت څخه د مندرس شویو بانکنوټونو د ایستلو په موخه، په شمال زون کې د ۸۴۳ میلیونه او ۴۳۰ زره افغانیو په ارزښت مندرس بانکنوټونه وسوځول.
یاد بانکنوټونه د افغانستان بانک د دویم مرستیال ښاغلي ملا محمد آخند په مشرۍ د ټاکل شوي پلاوي تر دقیقې شمېرنې او څارنې وروسته له منځه یووړل شول. پدې بانکنوټونو کې د افغانیو لسګون، شلګون، پنځوسګون، سلګون، پنځهسوهګون او زرګون بانکنوټونو انواعیې شاملې وې.
د مندرسو بانکنوټونو د سوځونې پر مهال ښاغلي ملا محمد آخند وویل، چې د افغانستان بانک د راکړو ورکړو د اسانتیاوو لپاره وخت په وخت مندرس بانکنوټونه له بازار څخه راټولوي او د نویو او سالمو بانکنوټونو په وړاندې کولو سره، درنو هېوادوالو ته اړینې آسانتیاوې رامنځته کوي. نوموړي له هېوادوالو غوښتنه وکړه، چې د افغانیو بانکنوټونو د سمې ساتنې لپاره جدي پاملرنه وکړي، څو د بانکنوټونو له بېوخته زړېدو او د بیا چاپ له لګښتونو څخه مخنیوی وشي.
د یادونې وړ ده، چې د مندرس شویو بانکنوټونو د راټولونې او له ګردښت څخه د ایستلو بهیر د هېواد په ټولو زونونو کې روان دی. هغه درانه هېوادوال چې مندرس بانکنوټونه لري، کولای شي د افغانستان بانک یا سوداګریزو بانکونو نمایندګیو ته مراجعه وکړي او یاد بانکنوټونه په نویو او سالمو بانکنوټونو بدل کړي.
