هیواد ته د نغدو بشري مرستو په لړ کې د ۴۰ میلیونه امریکایي ډالرو بله کڅوړه را ورسېده
۱۴۴۴ صفر المظفر ۲ مه - افغانستان ته د مرسته کوونکو هیوادونو د بشرپاله مرستو په لړ کې نن د څلوېښت میلیونه امریکایي ډالرو بله نغده کڅوړه افغانستان ته را ورسېده او یو سوداګریز بانک ته وسپارل شوه.
د افغانستان بانک د نړيوالې ټولنې له مرستو د مننې او قدردانۍ تر څنګ له دوی څخه غواړي چې د بانکي سکتور په برخه کې هم تعامل او همکاري ولري او له افغانستان سره د بانکي اړیکو زمینه برابره کړي.
د افغانستان بانک مشرتابه پلاوی پر دې باور دی چې افغانستان ته له هرې اصولي لارې د اسعارو راتګ نیک ګام دی او له نړيوالې ټولنې غواړي چې د بانکي سکتور له لارې خپلې بشري مرستې له افغانستان سره تر سره کړي. باید وویل شي چې دا په روانه اونۍ کې د بشري مرستو دویمه کڅوړه ده چې په نغد ډول افغانستان ته راوړل کېږي.
