دولتي کارکوونکو ته د رهني پورونو د ورکړې په برخه کې د آسانتیاوو رامنځته کولو په موخه د څلور اړخیز هوکړه لیک لاسلیک
د ۱۴۰۰ کال د غبرګولي ۱۱ مه – د افغانستان بانک د سوداګریزو بانکونو له لوري د کور جوړونې سکتور سره د دولتي کارکوونکو لپاره د پورونو د ورکړې په برخه کې د آسانتیاوو رامنځته کولو لپاره د ښارجوړونې او ځمکو وزارت، د افغانستان د بانکونو ټولنې او د ساختماني شرکتونو ټولنې سره څلور اړخیز هوکړه لیک لاسلیک کړ.
د افغانستان بانک سرپرست ښاغلي اجمل احمدي په هغه غونډه کې چې په همدې موخه جوړه شوې وه خبرې وکړې او د پورونو د ورکړې په برخه کې د آسانتیاوو رامنځته کول او په ځانګړې توګه په اقتصادي او د کور جوړونې په سکتورونو کې یې د بانکونو رول د ارزښت وړ وبلل.
نوموړي یادونه وکړه چې د افغانستان بانک د هېواد د مرکزي بانک په توګه د اغیزناکو طرحو او کړنلارو په وړاندې کولو سره د افغانستان بانکي نظام په ټولګټو پروژو کې د پانکې اچونو لپاره هڅولی دی چې په دې سره نه یوازې د هېواد بانکي نظام فعال شوی بلکې هېوادوال هم نېغ په نېغه او یا هم په غیر مستقیم ډول له آسانتیاوو څخه برخمن شوي دي.
ورپسې د ښارجوړونې او ځمکو وزارت وزیر ښاغلي محمود کرزي د افغانستان بانک له سرپرست ښاغلي اجمل احمدي مننه وکړه چې بېلابېلو اقتصادي برخو ته یې د پورونو د ورکړې آسانتیاوې رامنځته کړې دي. نوموړي د استوګنځایونو رامنځته کول د هر هېواد د اوسېدونکو له بنسټیزو اړتیاوو یاد کړل او زیاته یې کړه د خوښۍ ځای دی چې نن د دولتي کارکوونکو لپاره د استوګنځایونو د جوړولو لپاره د پورونو د ورکړې نوښت پیل شوی او اوسوداګریز بانکونه په دې برخه کې آسانتیاوې رامنځته کوي.
وروسته د افغانستان د بانکونو ټولنې رئیس ښاغلي سالم امید د بانکونو او خصوصي سکتور تر منځ د همغږۍ او اړیکو د پراختیا په برخه کې د افغانستان بانک د سرپرست ښاغلي اجمل احمدي له مثبت رول وستایه او زیاته یې کړه چې بانکونه د سیالیت په غوره وضعیت کې ځای لري او د هېواد د اقتصادي ودې لپاره له خصوصي سکتور سره د پورونو په برخه کې د هر ډول همکارۍ لپاره چمتو دي.
د دې غونډې په وروستۍ برخه کې د افغانستان د ساختماني شرکتونو د ټولنې مشر ښاغلي حمیدالله حبیبي د دولتي کارکوونکو لپاره د استوګنځي جوړولو په برخه کې د هر ډول چمتووالي خبره وکړه او ژمنه یې وکړه چې دوی به د دولتي کارکوونکو لپاره په مناسبه بیه استوګنځي جوړ کړي.
