د افغانستان د مالي او بانکوالۍ انستیتوت (AIBF) د مدیره پلاوي غونډه
۱۴۰۰ کال د غبرګولي ۱۸ مه – د افغانستان بانک د سرپرست ښاغلي اجمل احمدي په مشرۍ چې په ورته وخت کې د افغانستان د مالي او بانکوالۍ د انستیتوت د بورډ رئیس هم دی د دې انستیتوت د بورډ غونډه جوړه شوه. په دې غونډه کې د افغانستان د مالي او بانکوالۍ د انستیتوت غړو د افغانستان د بانکو ټولنې د رئیس ښاغلي سالم امید او د مسفا ادارې رئیس ښاغلي بهرام برزین ګډون کړی وو.
د دې غونډې په سر کې د یاد انستیتوت پر اساسانامه بحث وشو او ورپسې پر ښوونیزو پروګرامونو، د انستیتوت پر عوایدو او لګښتونو، تشکیلاتي جوړښت او د دې ادارې پر یو شمېر نورو اداري موضوعګانو خبرې وشوې او په اړه یې اړینې پرېکړې تر سره شوې.
په دې غونډه کې له کورنیو او بهرنیو اکاډمیکو مرکزونو سره په تخنیکي برخو کې د همکاریو پر امنځته کولو او ګډون هم بحث وشو او له معتبرو کورنیو او بهرنیو اکاډمیکو بنسټونو سره د سالمو اړیکو پر ټینګولو، معلوماتو او تجربو پر شریکولو او د معیاري ښوونیزو خدمتونو پر وړاندې کولو ټینګار وشو.
