په سوېل لویدیځ زون کې راټول شوي زاړه بانکنوټونه وسوځول شول
د افغانستان بانک قانون د ۳۹ او ۴۲ مادو او شته کړنلارو پر بنسټ د افغانۍ د زړو بانکنوټونو د سوځېدو په برخه کې، د افغانستان بانک څلور سوه او شل میلیونه او اته سوه یو دېرش زره (۴۲۰۸۳۱۰۰۰) افغانیو په کچه راټول شوي زاړه بانکنوټونه په سوېل لویدیځ زون کې په دوو پړاونو کې د ګمارل شوي پلاوي تر څار لاندې له کره شمېرنې او کنټرول وروسته د ۱۴۰۲ کال د لړم د میاشتې په ۱ او ۲ نېټه په کندهار ولایت کې وسوځول. باید ووایو چې په دې بانکنوټونو کې د ۱، ۲، ۵، ۱۰، ۲۰، ۵۰، ۱۰۰، ۵۰۰، ۱۰۰۰، افغانۍ انواعیې شاملې وې.
د افغانستان بانک لومړی مرستیال ښاغلی نور احمد آغا چې د زړو بانکنوټونو د سوځېدو د پلاوي په مشرۍ کندهار ولایت ته تللی وو، د خپلو خبرو پر مهال وویل چې د افغانستان بانک تل هڅه کړې څو خپلو درنو هېوادوالو ته په راکړو ورکړو کې اړینې بانکي او مالي اسانتیاوې رامنځ ته کړي. همدا ډول هغه زیاته کړه چې د افغانستان بانک له درېیو میاشتو راهیسې نوي بانکنوټونه بازار ته وړاندې کړي او په بدل کې یې زاړه بانکنوټونه له ګردښت څخه بهر کړي دي چې اوس مهال یې د سوځېدو پروسه له کندهار ولایت څخه پیل شوه.
د افغانستان بانک لومړي مرستیال د بانکنوټونو د ژر زړېدو بنسټیز لاملونه په بازار کې د نغدو پیسو کارول، د ورکړې د برېښنايي سیستمونو او اعتباري کارتونو نه کارول، د پیسو په شمېرلو کې د یو شمېر هېوادوالو ناسم چلند او د بانکونو پر ځای په کورونو کې د پیسو ساتل په ګوته کړل او له ګرانو هېوادوالو یې وغوښتل څو دې اصل ته په پاملرنې سره له موږ سره همکاري وکړي.
ښاغلي نور احمد آغا وویل چې د افغانستان بانک د ورکړو د برېښنايي کولو په برخه کې اغېزناکه هڅې ترسره کړي چې د خلکو په همکارۍ او د دې سیستمونو په کارولو سره په راتلونکي کې کولای شو له یوې خوا د بانکنوټونو د ژر زړېدو مخه ونیسو او له بلې خوا ورکړې چټکې، خوندي، رڼې او معیاري ترسره کړو.
د یادونې وړ ده چې په سوېل لویدیځ زون کې راټول شوي زاړه بانکنوټونه د مالیې او عدلیې وزارتونو، د کندهار ولایت د امنیتي مسوولینو او کارکوونکو، د افغانستان بانک د بېلابېلو شعبو له استازو او اړوندو ادارو څخه د جوړ شوي پلاوي په حضور کې ځانګړو بټیو (کورو) ته انتقال او وسوځول شول.
