په پوره مسئولیت سره د غوره بانکي خدمتونو پر واندې کولو د افغانستان بانک د رئیس ټینګار
۱۴۴۶ د ربیع الاول ۴ مه – د افغانستان بانک د ټولو رئیس ښاغلي نور احمد آغا له شمال زون، مزار شریف او حیرتان کې د افغانستان بانک له څانګو لیدنه وکړه.
په دې لیدنه کې د افغانستان بانک د ټولو رئیس ښاغلي نور احمد آغا د اسلامي بانکوالۍ پر ارزښت خبرې وکړې او زیاته یې کړه چې دا بانکوالي د اسلامي شریعت د اصولو پر بنسټ فعالیت کوي، چې سود (ربا) په کې نشته او پر ټولنیز عدالت ټینګار کوي. د نوموړي په خبره یادو ټکو ته په کتلو سره په کار ده چې دې بانکوالۍ ته پراختیا ورکړل شي.
د افغانستان بانک رئیس د یاد زون او څانګو له مسئولینو وغوښتل چې خلکو ته په پوره مسئولیت سره خدمتونه وړاندې کړي. نوموړي وویل، له فساد سره مبارزه، امانتداري، له مشتریانو سره ښه چلند او پر وخت دندو ته حاضریدل هغه ټکي دي چې ټول کارکوونکي یې باید په پام کې ونیسي.
د یادونې وړ ده چې د افغانستان بانک رئیس څو ورځې وړاندې د افغانستان بانک له څانګو څخه لیدنې، چارو د ارزونې، ستونزو د حل او کارکوونکو ته د لازمو لارښونو په موخه سفر پیل کړی او تر دې مهاله یې په بېلابېلو ولایتونو کې د دې بانک له څانګو لیدنې کتنې تر سره کړې دي.
