د افغانستان بانک سرپرست د ترکیې ۷۷ ساختماني شرکت له استازو سره ولیدل
د ۱۴۴۴ کال د شوال المکرم ۱۹ – د افغانستان بانک سرپرست رئیس، ښاغلي الحاج هدایت الله بدري د ۷۷ ترکي پانګونې او ساختماني شرکت له یو شمېر استازو سره لیدنه وکړه او د بانکي نظام او له دې لارې د دوی د پانګونې بهیر اسانولو په برخه کې د هغوی ستونزې او وړاندیزونه واورېدل.
د افغانستان بانک سرپرست د دې شرکت استازو ته ژمنه ورکړه څو د هېواد د ودانیزو پروژو د ملاتړ او د یادو پروژو د ودې او پرمختګ زمینې برابرولو لپاره دوی ته هر ډول بانکي اسانتیاوې برابرې کړي.
د یاد شرکت استازو د افغانستان بانک د سرپرست له دې ملاتړ څخه د خوښۍ په څرګندولو سره ژمنه وکړه څو په بیلابیلو برخو کې په افغانستان کې اغېزناکې پانګونې وکړي او د زېربنایي پروژو لکه د اوبو بندونو جوړولو په برخه کې له افغانستان سره مرسته وکړي.
