د افغانستان بانک د یو خبري کنفرانس له لارې خپلې د ۱۴۰۱ کال بنسټیزې کړنې او لاسته راوړنې له خلکو سره شریکې کړې
۱۴۴۴د رمضان المبارک ۱۴- د افغانستان بانک د روڼتیا او حساب ورکونې د اصل په پام کې نیولو سره نن د یو خبري کنفرانس له لارې چې د حکومت د رسنیو په مرکز کې جوړ شوی وو، د ۱۴۰۱ مالي کال بنسټیزې کړنې او لاسته راوړنې له رسنیو او د هغوی له لارې له درنو هېوادوالو سره شریکې کړې.
په پیل کې د افغانستان بانک د پولي سیاست لوی آمر ښاغلي احمد جواد سداد د افغانستان بانک د موخو، ماموریت او بنسټیزو دندو په تړاو خبرې وکړې او ۱۴۰۱ مالي کال یې د افغانستان بانک لپاره د لاسته راوړنو کال وباله.
ښاغلي سداد زیاته کړه چې د احصائیې او مالوماتو د ملي ادارې د وروستیو شمېرو پر بنسټ د انفلاسیون نرخ د ۱۴۰۱ کال د سلواغې په میاشت کې ۳.۵ سلنې ته رسیده، حال دا چې د تیر کال په ورته موده کې دا نرخ ۱۵.۳ سلنه وو. په ورته وخت کې د امریکايي ډالرو پر وړاندې د افغانۍ ارزښت ۱.۰۱ سلنه زیاتوالی موندلی دی؛ په داسې حال کې چې د ۱۴۰۰ ه ش کال په اوږدو کې د امریکايي ډالرو پر وړاندې د افغانۍ ارزښت ۱۳.۸۶ سلنه کموالي ښکاره کاوه.
ورپسې د بازار عملیاتو لوی آمر ښاغلي محمد عباس سامح د افغانستان د اسعاري زېرمو د محدودې برخې چې ورته لاسرسي لرو، د اغیزناکه مدیریت په تړاو خبرې وکړې او زیاته یې کړه چې د معقولو سیاستونو په پلي کولو سره توانیدلي یو د هېواد اسعاري اړتیاوې تأمین کړو.
ښاغلي سامح د افغانستان بانک له هڅو او د هېواد اسعاري زېرمو ته د بشپړې لاسرسۍ لپاره له نړیوالو سازمانونو سره د تخنیکي بحثونو خبر ورکړ او هیله یې څرګنده کړه چې دې چارې ته لاسرسی به د هېواد په مالي او بانکي نظام کې د پام وړ پرمختګونه رامنځته کړي.
د دې کنفرانس په بله برخه کې د افغانستان بانک د اسلامي بانکوالۍ او مالي خدمتونو لوی آمر ښاغلي ډاکټر محمد یوسف سلیم د بانکي نظام د مدیریت او ښه والي، د بانکي قوانینو او مقررو د بیا کتنې او د هېواد له اقتصادي شرایطو سره د هغه د عیارولو، د سوداګریزو بانکونو د کړنو د دوامدارې څارنې او په دې بانکونو کې له شخصي حسابونو څخه د پیسو د ترلاسه کولو د محدودیتونو د له منځه وړلو په موخه د درې کلن ستراتیژیک پلان د ترتیبولو په تړاو خبرې وکړې.
ښاغلي ډاکټر سلیم د هغو ګټورو بحثونو چې د ۱۴۰۱ مالي کال په اوږد کې له نړیوالو شریکانو سره د بانکي اړیکو او نړیوالو لېږدونو د ښه والي په اړه ترسره شوي وو، یادونه وکړه او د امریکا متحده ایالاتو د خزاندارۍ وزارت ۱۴، ۱۵، ۱۶، ۱۷، ۱۸، ۱۹ او ۲۰ شمېرو عمومي جوازونو ته لاسرسی یې چې د هېواد د اړتیا وړ لومړنیو توکو د واردولو په موخه د پولي لېږدونو د اسانتیا لامل شوی، ستره لاسته راوړنه یاده کړه.
نوموړي د خپلو خبرو په بله برخه کې په هېواد کې د اسلامي بانکوالۍ پراختیا او پرمختیا یوه بنسټیزه اړتیا وبلله او ټینګار یې وکړ چې د افغانستان بانک د تېر کال په اوږدو کې اغېزناکې هڅې کړي چې له ډلې یې کولای شو د صکوکو د قانون د لومړنۍ مسودې چمتو کولو، په اسلامي بانک د کوچنیو پورونو د لومړني بانک بدلولو او د اسلامي بانکوالۍ محصولاتو ته د څو لارښودونو او کړنلارو نهایي کولو ته اشاره وکړو.
په پای کې د افغانستان بانک د غیر بانکي مالي مؤسسو د څارنې لوی آمر ښاغلي احمد ظاهر ناصرزي د غیر بانکي مالي مؤسسو لکه صرافیو، پولي خدمتونو وړاندې کوونکو، د برېښنایي پیسو مؤسسو، د اجارې مؤسسو او اداینیزو مؤسسو د کړنو د تنظیمولو په اړه خبرې وکړې.
ښاغلي ناصرزي د دې سکتور د کړنو تنظیمولو لپاره د یوې هر اړخیزې طرحې د جوړولو یادونه وکړه چې د افغانستان اسلامي امارت د قدرمنې کابینې لخوا منظور شوې چې په رڼا کې یې د صرافۍ او پولي خدمتونو د وړاندې کوونکو له ۲۵۰۰ څخه زیات انفرادي جوازونه لغوه شوي او په بدل کې یې د صرافیو او پولي خدمتونو وړاندې کوونکو شرکتونو ته په نویو معیارونو برابر ۸۷۶ شرکتي جوازونه ویشل شوي دي. په همدې ترتیب د صرافیو او پولي خدمتونو پر شرکتونو د بندیزونو د نوملړ برېښنایي کول، د غیر قانوني صرافیو په ګوته کولو او د دوی د کړنو د بندولو په موخه د اړوندو ادارو ترمنځ د ګډې کمېټې جوړول، د ۷۰۰ څخه زیاتو غیر قانوني صرافیو پېژندل او د تنفیذي اقداماتو ترسره کول او د پیسو وینځلو او له جرمونو څخه د ترلاسه شویو عوایدو پر وړاندې مبارزه نورې هغه لاسته راوړنې دي چې د افغانستان بانک د ۱۴۰۱ مالي کال په اوږدو کې ترلاسه کړي دي.
د افغانستان بانک د روڼتیا او حساب ورکونې دا رسنیز کنفرانس د هېواد د ټولیزو رسنیو د استازو په پوښتنو او د افغانستان بانک د مسؤلینو په ځوابونو سره پای ته ورسېد.
